სახელდახელო საწებლები და მწნილები

ახალი (მწვანე) ტყემლის საწებელი (1)

გადარჩეული და გარეცხილი ტყემალი მოათავსეთ ქვაბში, დაასხით იმდენი წყალი, რომ ფარავდეს, დადგით ცეცხლზე და მოხარშეთ. შემდეგ გადაწურეთ და წვენი შეინახეთ ცალკე ჭურჭელში, ტყემალი გახეხეთ საწურზე. ხორცსაკეპში გაატარეთ ქინძი, ომბალო, კამა, ცერეცო, ნიორი. წიწაკა და მარილი დანაყეთ ერთად. ყველაფერი შეურიეთ გახეხილ ტყემალს. თუ სქელი გამოვიდა, დაუმატეთ თავისივე წვენი.

მასალა:

ტყემალი - 1 კგ.
მარილი, წიწაკა - გემოვნებით
ომბალო - 2 კონა
ნიორი - 2 კბილი
ქინძი, ცერეცო, კამა - თითო პატარა კონა

ტყემლის საწებელი ნიგვზით (1)

ტყემალს დაასხით 1/4 ჩაის ჭიქა წყალი და ადუღეთ 10 წუთი, მერე გადაიტანეთ საწურზე და დატოვეთ, სანამ სითხისგან არ დაიწრიტება. ტყემალი არ გახეხოთ, იგი სხვა რამისთვის გამოიყენეთ.

დანაყილ ნიგოზს, ნიორს, ქინძს, წიწაკას, მარილს დაასხით ტყემლის წვენი სასურველ სისქემდე და კარგად აურიეთ.

მასალა:

ტყემალი - 1 ჩაის ჭიქა
წყალი - 1/4 ჩაის ჭიქა
ნიგოზი - ნახევარი ჩაის ჭიქა
ნიორი - 2 კბილი
ქინძი - 2 ძირი
წიწაკა, მარილი - გემოვნებით

ქინძმარი (1)

გაატარეთ ხორცსაკეპში ქინძი, კამა და ნიორი. გახსენით ყველაფერი წყალში, დაუმატეთ ძმარი და მარილი გემოვნებით.

მასალა:

ქინძი - 1 საშუალო კონა
კამა -  1 თავი პატარა კონა
წყალი - 1 ჩაის ჭიქა
ნიორი - 1 კბილი
წიწაკა, მარილი - გემოვნებით
ძმარი - 2-3 სუფრის კოვზი

ნიორწყალი (1)

ორი თავი ნიორი დაარჩიეთ, გაატარეთ ხორცსაკეპში, შეურიეთ ცივი წყალი სასურველ სისქემდე. შეაზავეთ მარილით.

მასალა:

ნიორი - 2 თავი
წყალი - რამდენიც დასჭირდება
მარილი - გემოვნებით

ახალი კიტრის მწნილი (1)

ქორფა კიტრი კარგად გარეცხეთ, მოათავსეთ მინის ჭურჭელში, შიგ ჩააყოლეთ სანელებლები და დაასხით მდუღარე მარილიანი წყალი. ერთ დღეში კიტრი მზად იქნება.

მასალა:

კიტრი - 20 ცალი
მარილი - 100 გ.
პირშუშხა - 20 გ. ან ალუბლის ფოთლები - 10 ცალი
წყალი - 1,5 ლ.
ცერეცო - 1 პატარა კონა
ნიორი, წიწაკა - გემოვნებით

მწვანე პამიდვრის მწნილი (1)

მწვანე პამიდორდ მოაშორეთ ყუნწები, გარეცხეთ და ალყა-ალყა დაჭერით. ასევე მრგვლად დაჭერით ხახვი, მოაყარეთ დაჭრილი წითელი ცხარე წიწაკა, ოხრახუში, ნიახური და კარგად აურიეთ. შეაზავეთ მარილითა და ძმრით. ასე შეზავებული პამიდორი 1-2 საათის შემდეგ შეგიძლიათ მიირთვათ. ინახება მაცივარში რამდენიმე კვირის განმავლობაში.

მასალა:

პამიდორი - 2 კგ.
ხახვი - 4-5 თავი
ნიახური - 3 საშუალო კონა
ოხრახუში - 3 საშუალო კონა
წიწაკა, მარილი - გემოვნებით
ძმარი - ჭარბად

ყვავილოვანი კომბოსტოს მწნილი (1)

ყვავილოვანი კომბოსტო კონებად დაანაწევრეთ, ჭარხალი გათალეთ და გიფურული დანით დაჭერით ლამაზ ნაჭრებად.

შუშის ქილაში ან მინანქრის ქვაბში მოათავსეთ ფენებად: ყვავილოვანი კომბოსტოს კონები, დაჭრილი ჭარხალი, ნიახური, ნიორი და დაფნის ფოთოლი. მოასხით მდუღარე მარილწყალი, ზემოდან დააფარეთ მარლის ნაჭერი და გააჩერეთ ოთახის ტემპერატურაზე რამოდენიმე დღე. შემდეგ დაახურეთ სახურავი და დადგით გრილ ადგილას.

ჭარხალი შეგიძლიათ შეცვალოთ სტაფილოთი. მაშინ ყვავილოვანი კომბოსტოს მწნილი თეთრი ფერის იქნება.

მასალა:

ყვავილოვანი კომბოსტო - 3 კგ.
ჭარხალი - 3 თავი (საშუალო)
ნიახური - 2 კონა (საშუალო)
ნიორი - 2-3 კბილი
დაფნის ფოთოლი - 2-3 ცალი
მარილი - 1,5 სუფრის კოვზი ლიტრ წყალზე